Leikurinn
Leikurinn er undirstaða alls náms á leikskóla. Hann er eðlilegur þáttur í lífi barns, jafn nauðsynlegur þroska þess og fæðan sem það nærist á.

Þema- og hópastarf
Að vinna saman í hóp er tilvalin leið til að auðga þekkingu og menntun einstaklingsins auk þess að gefa hverju barni kost á að þroska með sér virkni, jafnræði, samvinnu og gleði.

Litavikur
Þema vetrarins hefst á Litavikunum. Í september á meðan nývistun flestra barnanna stendur og nýtt starfsfólk kemur til starfa er gott að byrja á mjög afmörkuðu efni sem allir geta tekið þátt í og komið inn í á hvaða tímapunkti sem er.

Dagskipulag
Dagskipulag er sá rammi sem við sníðum okkur til að halda utan um allt okkar starf. Inn í þennan ramma raðast öll þau verkefni sem leikskólinn hefur einsett sér að vinna og leysa úr með nemendum sínum. Til að skila af sér agaðri vinnubrögðum auk þess að geta sýnt fram á þróun og þroska leikskólans er nauðsynlegt að dagskipulagið sé sniðið að þörfum einstaklingsins og það sé í sífelldu endurmati. Hver deild þróar sitt dagskipulag með þarfir hvers barns/hóps að leiðarljósi. Gott dagskipulag á að þjóna öllum sem koma að leikskólanum, bæði börnum, starfsfólki og foreldrum. Það má segja að ytri umgjörð dagskipulags eigi að þjóna foreldrum og öðrum aðstandendum leikskólans auk þjónustuaðilum en innri uppbygging dagskipulags þjóni nemendum og kennurum leikskólans.

Að sameina þessa þætti er grundvöllur allrar starfsemi sem fram fer á leikskólanum. Hjálpartækin eru margvísleg, allt frá því sem móðir náttúra leggur okkur til að þeim hjálpargögnum sem samfálagið hefur þróað og hannað í þágu náms. Gott er að geta valið en við sem sinnum óþroskuðum anda lítils barns megum ekki gleyma að blóm, steinn eða bara gamaldags drullupollur getur verið alveg jafn spennandi og nýju þroskakubbarnir, bendibækurnar og hljóðabingóið