Múgur og margmenni á Háskólatorgi að hlusta á Hjálma.

Troðfullt var og mikil stemning á tónleikum Hjálma á Háskólatorgi í dag. Tónleikarnir voru partur af dagskrá nýnemadaga Háskóla Íslands og voru í boði Félagsstofnunar Stúdenta. Greinilegt var að nýnemar, sem og aðrir nemar og starfsfólk Hí, kunnu vel að meta viðburðinn og var mikil gleði yfir mannskapnum og hljómsveitinni vel fagnað að lokum.

Frábærir tónleikar

Þeir tónleikagestir sem Stúdent.is ræddi við voru hæstánægðir með tónleikana og sögðu það kærkomið og í rauninni lífsnauðsynlegt að lyfta sér aðeins upp úr lærdómnum sem byrjaður sé af fullum krafti og gaman sé að hitta félagana úr öðrum deildum HÍ. ,,Hjálmar voru frábærir og er ekki amalegt að vera boðið á svona tónleika á Háskólatorgi þar sem allir nemendur úr öllum deildum geta hist og fengið sér bjór og átt saman gleðistund og hugsað um eitthvað annað en námið,“sögðu Hektor Már Jóhannsson og Guðmundur Örn Sigurðsson nemar á 2. ári í umhverfis- og byggingarverkfæði. Vonuðu þeir félagar að sem mest verði af spennandi viðburðum á Háskólatorgi í vetur til að brjóta upp hina hefðbundnu skóladaga.