Það var á gráum degi í október fyrir rúmum sjö árum að ég gekk út úr kennslustund með tárin í augunum. Þetta var fyrsta önnin mín í Háskóla Íslands eftir fimm ára námshlé að loknu stúdentsprófi.

Ég var orðin á eftir í öllu lesefni, mætti ólesin í flesta tíma og fannst ég þar af leiðandi ekkert skilja og ekkert geta og vera á algjörum villigötum í lífinu. Auk þess var margt í einkalífinu sem dró úr mér orku svo að þennan dag ætlaði ég einfaldlega að hætta í skólanum. Gefast upp.

Á leið minni út á strætóstöð kviknaði einhver neisti af sjálfsbjargarviðleitni við dyr Félagsstofnunar stúdenta sem rak mig inn í Náms-og starfsráðgjöf HÍ til að biðja um viðtal við ráðgjafa. Fljótlega vísaði góðleg og björt kona mér inn á skrifstofuna sína þar sem ég settist niður og byrjaði að gráta.

Góðlega konan rétti mér kassa með bréfþurrkum og leyfði mér að gráta vel og lengi, sennilega í einar tíu mínútur. Loks þegar mér tókst að lýsa hikstandi fyrir henni aðstæðum mínum huggaði hún mig með því að ég væri alls ekki ein um þessa líðan og þaðan af síður ein á báti.

Stuttu síðar var tilbúin fyrir mig dagskrá. Ég mætti tvisvar í viku til námsráðgjafa sem hjálpaði mér við að skipuleggja námið, klára önnina og taka jólaprófin. Svo var mér vísað til sálfræðings NSHÍ til koma einkalífinu í réttar skorður. 

Í dag hef ég lokið BA- og MA-prófi og er m.a.s. byrjuð á annarri meistaragráðu. Hversu ótrúleg hefði mér þótt sú tilhugsun þennan örlagaríka haustdag fyrir sjö árum?

Ragna Ólafsdóttir er sálfræðingur í hálfu starfi hjá NSHÍ sem nú er til húsa á 2. hæð Háskólatorgs. Hún segir að það sé nauðsynlegt fyrir fólk í háskólasamfélaginu að hafa einhvern til að leita til þegar erfiðleikar hamli fólki í námi. Ragna hefur unnið hjá NSHÍ í yfir tuttugu ár og var í fyrstu ráðin sem námsráðgjafi en fór fljótlega að sinna sálfræðilegri ráðgjöf ásamt öðrum sálfræðingi sem starfaði þar sem námsráðgjafi.

Síðar lögðu starfsmenn námsráðgjafarinnar mikla áherslu á að búin yrði til staða sálfræðings til að gera þann þátt þjónustunnar sýnilegri, en allir ráðgjafar Náms-og starfsráðgjafar hafa jafnframt menntun og þjálfun í sálfræðilegri aðstoð.

Meti þeir stöðu einstaklingsins hins vegar þannig að hann þurfi frekari sálfræðiaðstoð tekur Ragna við og veitir annaðhvort skammtímameðferð eða vísar viðkomandi á viðeigandi úrræði utan háskólasamfélagsins. Hún segist þó halda áfram að fylgjast með viðkomandi og þannig reyni allir hjá NSHÍ að halda utan um þá einstaklinga sem til þeirra leita.

Ragna segir Geðspekivefinn, sem opnaður var í febrúar, geta auðveldað námsmönnum og aðstandendum þeirra til muna að finna réttan farveg fyrir áhyggjur sínar og vandamál. Þar geti fólk leitað upplýsinga og fræðst um geðheilsu almennt, hvað teljist eðlileg streitueinkenni og hvenær tímabært sé að leita aðstoðar.

Segist Ragna vona að þessi nýja upplýsingagátt muni bæði hjálpa fólki til að þora að leita hjálpar og skilja betur hvað getur haft áhrif á líðan þess.

Frekari upplýsingar um þjónustu Náms-og starfsráðgjafar HÍ má finna á heimasíðu hennar.