Ein leið að því markmiði er að gæta jafnréttissjónarmiða og vinna að kynjasamþættingu í stefnumótun og ákvörðunum á öllum sviðum samfélagsins. Í samþættingu kynja- og jafnréttissjónarmiða felst að (endur)skipuleggja, bæta, þróa og leggja mat á stefnumótunarferli, þannig að sjónarhorn kynjajafnréttis sé fléttað inn í stefnumótun og ákvarðanir á öllum sviðum, af þeim aðilum sem venjulega taka þátt í stefnumótun. Þetta er skilgreining Evrópuráðsins en þetta er einnig sú leið sem ríkisstjórnin hefur valið til að koma jafnrétti á hér á landi.

 

Umræða um hvort jafnréttishugtakið nái eingöngu yfir jafnrétti kynjanna, eða hvort barátta minnihlutahópa fyrir réttindum sínum eigi þar heima hefur verið áberandi á Norðurlöndunum og innan Evrópusambandsins. Jafnrétti margbreytileikans nær einnig yfir jafnréttisbaráttu minnihlutahópa, svo sem samkynhneigða, fatlaða, innflytjendur og aldraða. Áhersla er lögð á að skoða samspil ólíkra þátta sem í sameiningu móta líf einstaklinga eða hópa. Þetta er m.a. gert í jafnréttisstarfi Háskóla Íslands sem hvílir á þremur meginstoðum; áætlun um jafnrétti kynjanna , stefnu í málefnum fatlaðra og stefnu Háskóla Íslands gegn mismunun.