Hlutverk rannsóknaseturs í fötlunarfræðum  er að auka og efla rannsóknir í fötlunarfræðum og á málefnum fatlaðs fólks meðal annars með því að tengja sem best rannsóknir og kennslu í fötlunarfræðum, laða fræðimenn til starfa á þessum vettvangi og veita nemendum í framhaldsnámi aðstöðu fyrir rannsóknir en nú eru tveir nemar í doktorsnámi á þessu fræðasviði auk nokkurra meistaranema. Markmið fötlunarfræði er að þróa nýjan skilning: fötlun sé ekki síður félagslegt fyrirbæri en læknisfræðilegt. Fötlunarfræði er þverfaglega grein og í rannsóknum hérlendis er m.a. kannað hvernig fjallað er um fatlaða í bókmenntum, listum og dægurmenningu.

Með rannsóknasetri í fötlunarfræðum skapast þverfaglegur vettvangur rannsókna á sviði fötlunarfræða en stofnunin er sú fyrsta á þessu fræðasviði hér á landi. Rannsóknasetrið starfar sem undirstofnun Félagsvísindastofnunar og njóta góðs af þeirri miklu reynslu sem þar er til staðar. Forstöðumaður rannsóknasetursins er Rannveig Traustadóttir prófessor og aðstoðar-forstöðumaður er Hanna Björg Sigurjónsdóttir lektor í fötlunarfræðum. Hrefna K. Óskarsdóttir hefur verið ráðin verkefnisstjóri og mun annast daglegan rekstur setursins.

Rannsóknasetrið starfrækir vefsetur sem er ætlað að vera miðstöð þekkingar, fróðleiks og upplýsinga í fötlunarfræðum og fróðleiksbrunnur fyrir fatlað fólk og aðra sem hafa áhuga á málefnum fatlaðra.

Rannsóknasetur í fötlunarfræðum við Félagsvísindastofnun Háskóla Íslands var formlega stofnað þann 3. mars 2006 þegar samstarfssamningur milli Minningarsjóðs Margrétar Björgólfsdóttur og Háskóla Íslands var undirritaður.

Netfang:  fotlun@hi.is

Rannsóknasetur  í fötlunarfræðum
Háskóla Íslands
Félagsvísindadeild
Gimli v/ Sturlugötu
101 Reykjavík