Á deildarfundum eiga sæti prófessorar, dósentar, lektorar og aðjunktar svo og forstöðumenn rannsóknarstofnana er tilheyra einstökum deildum. Einnig eiga kjörnir fulltrúar stúdenta sæti á deildarfundum.

Fjöldi fulltrúa stúdenta er breytilegur eftir deildum og ræðst í raun af því hversu margir aðrir eiga rétt á fundarsetu og hafa atkvæðisrétt. Á skorarfundum ríkir samskonar fyrirkomulag og á deildarfundum. Fulltrúar stúdenta skulu kjörnir ár hvert af nemendafélagi þeirra.

Mjög margar mikilvægar ákvarðanir sem varða deildir og skorir og hagsmuni stúdenta innan þeirra eru teknar inni á deildar- og skorarfundum og því er mjög mikilvægt að stúdentar eigi þar öfluga fulltrúa. Deildar- og skorarfulltrúar sitja á fundum fyrir hönd allra stúdenta í sinni skor eða deild og eiga að gæta hagsmuna þeirra á fundunum, sem og almennt.

Skorar- og deildarfulltrúar geta einnig tekið upp mál á deildarfundum að eigin frumkvæði og geta það m.a. verið mál sem aðrir stúdentar koma til þeirra. Stúdentar eru því hvattir til að leita til síns deildar- eða skorarfulltrúa ef eitthvað brennur á þeim.

Háskóli Íslands er samfélag þar sem stúdentar spila mjög stórt hlutverk og þess vegna einsetja starfsfólk og kennarar HÍ sér það að hlusta á stúdenta. Deildar- og skorarfulltrúar gegna mikilvægu hlutverki í hagsmunabaráttu stúdenta, því oft er best að leysa einstök mál þar sem þau koma upp.