Lög Stúdentaráðs Háskóla Íslands
I. Nafn og tilgangur
II. Kosningar og kjörstjórn
III. Valdataka – fastanefndir
V. Fundir Stúdentaráðs
VI. Framkvæmdastjóri - blaðaútgáfa - jafnréttisfulltrúi - alþjóðafulltrúi
VII. Réttindaskrifstofa stúdenta
VIII. Skilafundur
IX. Almennir stúdentafundir
X. Gildistaka og breytingar
-- English summary --
I. Nafn og tilgangur
1. gr. Við Háskóla Íslands skal vera stúdentaráð, sem nefnist fullu nafni: Stúdentaráð Háskóla Íslands (The Students´ Council at the University of Iceland). Heimili þess er skrifstofa Stúdentaráðs á Háskólatorgi við Sæmundargötu. Varnarþing þess er í Reykjavík.
2. gr. Stúdentaráð skal standa vörð um menningarlega og félagslega hagsmuni stúdenta við Háskóla Íslands og vera æðsti fulltrúi þeirra innan Háskólans og utan.
3. gr. Stúdentaráð skal vera þeim félögum stúdenta við Háskóla Íslands, sem annast félagslíf eða hagsmunamál, til aðstoðar ef þurfa þykir. Ráðinu ber að vinna að því að félögin þjóni hlutverki sínu.
4. gr. Stúdentaráð er aðili að Æskulýðssambandi Íslands og tekur þátt í norrænu samstarfi stúdentasamtaka. Ráðinu er heimilt að taka þátt í störfum annarra samtaka samkvæmt samþykkt hverju sinni. Ákvörðun um skipulagsbundna aðild að öðrum samtökum lýtur sömu reglum og lagabreytingar.
5. gr. Starfstími Stúdentaráðs miðast við skiptafund ár hvert, en reikningar miðast við 1.mars ár hvert.
6. gr. Stúdentaráð skal skipað 20 fulltrúum háskólastúdenta. Skulu 18 fulltrúar kosnir hlutbundinni listakosningu til Stúdentaráðs auk þess sem fulltrúar stúdenta í háskólaráði sitja í Stúdentaráði.
II. Kosningar og kjörstjórn
7. gr. Á fyrstu þremur vikum febrúar ár hvert skulu í hlutbundinni listakosningu kosnir 9 menn í Stúdentaráð. Leitast skal við eftir fremsta megni að sem flestir stúdentar nýti kosningarétt sinn. Í því skyni skal taka mið af frívikum deilda. Kjörtímabil er tvö ár, sbr. þó 2.mgr 23.gr. Á sama tíma annað hvert ár skal kjósa fulltrúa stúdenta til háskólaráðs. Þau ár sem ekki er kosið til háskólaráðs skal kjósa fulltrúa stúdenta á háskólaþing. Fulltrúar stúdenta til háskólaráðs og á háskólaþingi skulu kosnir hlutbundinni listakosningu, eftir því sem lög kveða á um, til tveggja ára í senn. Framkvæmd kosninga til háskólaráðs og háskólaþings skal fara eftir II. kafla laga þessara.
8. gr. Varamenn aðalfulltrúa af hverjum lista eru allir þeir sem á listanum eiga sæti, og í sömu röð og þeir endanlega hljóta.
9. gr. Kosningarétt og kjörgengi til Stúdentaráðs, háskólaráðs og háskólaþings hafa allir sem skráðir hafa verið til náms á yfirstandandi skólaári samkvæmt reglugerð Háskólans. Frambjóðendur til Stúdentaráðs þurfa einungis að uppfylla kjörgengisskilyrði á fyrra ári kjörtímabils.
10. gr. Framboð til Stúdentaráðs er með þeim hætti að fram skal boðinn listi 18 einstaklinga. Framboð til háskólaráðs er með þeim hætti að fram skal boðinn listi 6 einstaklinga. Framboð til háskólaþings er með þeim hætti að fram skal boðinn listi 20 einstaklinga.
11. gr. Framboð skulu vera skrifleg. Skal fylgja hverjum lista skriflegt samþykki allra þeirra sem á honum eiga sæti þess efnis að þeir taki sæti á listanum. Hver listi skal studdur 120-150 stúdentum að auki. Kjósanda er aðeins heimilt að mæla með einum lista til Stúdentaráðs, háskólaráðs og háskólaþings. Gæta skal að tilgreina skýrlega fullt nafn, kennitölu og deild frambjóðenda og stuðningsmanna.
12. gr. Stúdentaráð kýs fyrir 15. október ár hvert kjörstjórn til að sjá um kosningar til Stúdentaráðs, háskólaráðs og háskólaþings. Fulltrúar í kjörstjórn skulu að jafnaði koma úr öllum deildum. Óheimilt er að skipa Stúdentaráðsliða, háskólaráðsliða eða fulltrúa stúdenta á háskólaþingi til setu í kjörstjórn. Sama gildir um frambjóðendur til Stúdentaráðs, háskólaráðs eða háskólaþings. Stúdentaráð skipar einnig formann kjörstjórnar sérstaklega. Nú falla atkvæði jöfn á kjörstjórnarfundi, ræður þá atkvæði formanns úrslitum. Kjörstjórn annast aðalkosningar, aukakosningar og atkvæðagreiðslu utan kjörfundar, undirbýr kosningar, ákveður kjörfund og hverja aðra framkvæmd sem við kemur kosningum. Heimilt er kjörstjórn að skipa sér aðstoðarmenn við framkvæmd kosninga. Kjörstjórn skal skila skriflegri skýrslu um störf sín og framkvæmd kosninganna til Stúdentaráðs eigi síðar en 2 mánuðum eftir kosningarnar.
13. gr. Kjörstjórn útbýr kjörskrá og skal hún liggja frammi á skrifstofu Stúdentaráðs a.m.k. tvo síðustu virku dagana áður en kosning utan kjörfundar hefst. Kærur vegna kjörskrár skulu hafa borist kjörstjórn eigi síðar en kl. 12.00 á hádegi daginn áður en kosning utan kjörfundar hefst. Úrskurðum kjörstjórnar má skjóta til Stúdentaráðs.
14. gr. Kjörstjórn lýsir eftir framboðum og skal framboðsfrestur vera minnst ein vika og rennur út 10 dögum fyrir kjörfund. Kjörstjórn skal auglýsa aðsetur sitt með almennum stúdentapósti, þar sem framboðum er veitt viðtaka og þar sem unnt er að ná sambandi við hana.
15. gr. Berist ekki framboð til Stúdentaráðs og/eða háskólaráðs eða háskólaþings skal framlengja framboðsfrest um 3 sólarhringa og fresta kosningum jafn lengi. Skal slík framlenging auglýst rækilega af kjörstjórn.
16. gr. Berist aðeins eitt framboð til Stúdentaráðs, háskólaráðs eða háskólaþings skoðast sá listi sjálfkjörinn.
17. gr. Kjörstjórn úthlutar bókstöfum til lista og þá með tilliti til þeirra venja, sem þegar hafa skapast í því efni og skal auglýsa rækilega framkomin framboð, bókstafi þeirra og alla kosningatilhögun, svo sem atkvæðagreiðslu utan kjörfundar og hvenær kjörfundur fer fram. Kjörstjórn annast gerð kjörseðla, rafrænna jafnt sem skriflegra. Á þá skal rita nöfn framboða, listabókstafi og framboðslista í stafrófsröð eftir listabókstöfum. Á kjörseðli skal einnig birta framboðslista fyrra árs til Stúdentaráðs. Kjósanda skal einungis heimilt að greiða einum lista á hvorum kjörseðli atkvæði sitt og má hann breyta röð frambjóðenda og strika út eftir almennum reglum um Alþingiskosningar. Kjörstjórn metur eftir almennum reglum um Alþingiskosningar gildi atkvæðis og hverjum það telst greitt, svo og framkomnar breytingar á röð frambjóðenda.
18. gr. Kosningar til Stúdentaráðs skulu vera rafrænar sé þess kostur. Kjörstjórn skal heimilt að leita til sérfróðra aðila um framkvæmd rafrænna kosninga. Framkvæmd skal vera hagað þannig að öllum stúdentum sé gert kleift að nýta kosningarétt sinn og kosning opin á Uglunni í allt að tvo daga.
Sé ekki unnt að halda rafrænar kosningar á öruggan hátt skv. 1. mgr. skal 2. mgr. gilda um kosningarnar. Kjörstjórn ákveður staðsetningu kjördeilda að höfðu samráði við deildar- og skorarfélög. Við val á staðsetningu skal gæta þess að kosningin geti farið leynilega fram og næði kjósenda við kosningu tryggt. Kjördeildir skulu vera á a.m.k. níu stöðum á kennslusvæðum háskólans, enda skal miðað við það að stúdentar geti á sem auðveldastan máta greitt atkvæði. Kjörfundur stendur yfir í tvo daga. Kjörstjórn ákveður hvaða kjördeildir skulu opnar frá kl. 9.00-13.00 og hverjar frá 9.00-18.00 fyrri kjördag. Kjördeildir skulu opnar frá kl. 9.00-18.00 seinni kjördag. Kjörstjórn skal auglýsa kjördeildir a.m.k. 15 dögum fyrir kjörfund. Heimilt er að skjóta ákvörðunum kjörstjórnar um kjördeildir til Stúdentaráðs. Skal það gert a.m.k. 10 dögum fyrir upphaf kjörfundar.
19. gr. Allur áróður í byggingum Háskóla Íslands skal bannaður á kjördögum. Sé ekki kosið rafrænt, mega frambjóðendur ekki vera í sjónmáli við kjördeild og aldrei í minna en 10 metra fjarlægð nema þeir séu að kjósa á leið í tíma eða á leið inn í eða út úr viðkomandi byggingu. Frambjóðendum er heimilt að vera í byggingum sem kosið er í, þurfi þeir að sækja tíma eða sinna öðrum sambærilegum erindum.
Kjörstjórnarfulltrúar veita skriflega áminningu ef brotið er gegn lagaákvæðum um framkvæmd kosninga. Kjörstjórnarfulltrúi sem áminningu veitir skal gera áminntum aðila grein fyrir ástæðu áminningarinnar, og veita honum færi á að koma að athugasemdum. Sé aðili þrívegis áminntur er kjörstjórn skylt að tilkynna stúdentum um hvaða aðila er að ræða og fyrir hvað hann var áminntur. Tilkynningin skal birt á opinberum vettvangi; á tilkynningatöflum og á heimasíðu Stúdentaráðs. Sé um að ræða frambjóðanda skal tekið fram hvaða framboði hann tilheyrir.
Áminntur aðili getur skotið áminningunni til kærunefndar kjörstjórnar innan klukkustundar eftir að hún er veitt. Skal hún úrskurða um réttmæti áminningar innan innan klukkustundar frá því að kæra berst. Kjörstjórn skal skipa þrjá einstaklinga í kærunefnd viku fyrir fyrri kjördag.
20. gr. Framboðum skal heimilt að hafa eftirlit með kjörstjórn hvort sem kosið er rafrænt eður ei. Kjörstjórn setur nánari reglur um það.
Þegar kjörfundi lýkur á seinni degi kosninganna er fulltrúum framboðanna heimilt að bera saman eftirlitsgögn úr mismunandi kjördeildum m.a. til að gæta þess að einstaklingur hafi ekki greitt atkvæði í tveimur kjördeildum.
Þessi samanburður gagna fari fram undir eftirliti kjörstjórnar á milli þess sem að kjörfundi lýkur og talning hefst.
Fulltrúa framboðs er einnig heimilt, innan kærufrests skv. 21.gr. að nálgast eftirlitsgögnin undir eftirliti kjörstjórnar í eitt skipti, til þess að fara yfir gögnin að fengnum kosningaúrslitum.
Eftirlitsgögnum framboða skal eytt að kærufresti loknum.
21. gr. Utankjörfundur skal haldinn í þrjá virka daga frá kl. 11:00- 16:00 í síðustu viku fyrir kjördag. Þeir sem greiða atkvæði við slíka atkvæðagreiðslu skulu gefa út drengskaparheit um að þeir telji sig ekki geta greitt atkvæði á kjördag. Stúdentum sem ekki geta greitt atkvæði á þessum tíma, vegna sjúkdóms, fötlunar, barnsburðar, veikinda barns, eða annarra sambærilegra ástæðna, er heimilt að greiða atkvæði í heimahúsi eða á stofnun. Ósk um að greiða atkvæði með þessum hætti skal vera skrifleg eða send með tölvupósti á heimilis- eða tölvupóstfang sem kjörstjórn skal taka fram á auglýsingu skv. 18. gr., og studd drengskaparheiti um að viðkomandi geti ekki greitt atkvæði á kjörstað eða í hefðbundinni utankjörfundaratkvæðagreiðslu vegna framangreindra ástæðna. Slíka umsókn má setja fram eftir að framboð koma fram samkvæmt 11.gr., og skal hún hafa borist kjörstjórn eigi síðar en fjórum klukkustundum fyrir lokun kjörstaða. Kjörstjórn tekur afstöðu til framkominna óska. Atkvæðagreiðslan skal fara fram í viðurvist tveggja kjörstjórnarmanna og atkvæðið afhent formanni kjörstjórnar í lokuðu umslagi.
22. gr. Eftir hvern dag utankjörfundaratkvæðagreiðslu skulu atkvæðin innsigluð af þar til bærum aðila. Við talningu atkvæða skal kjörstjórn sjá til þess að innsiglin séu órofin.
Fari kosning fram skriflega skal 1. mgr. gilda um almenn atkvæði frá fyrri kjördegi.
23. gr. 1. Að afloknum kosningum telur kjörstjórn atkvæði og úrskurðar hverjir teljist réttkjörnir samkvæmt almennum reglum um hlutbundnar listakosningar. D'hondt reiknireglan skal notuð til að reikna skipan stúdentaráðs.
2. Ráðið skal aðlagast úrslitum kosninga hverju sinni. Þetta skal framkvæmt þannig:
a. Ef framboðsaðili til Stúdentaráðs hlýtur fleiri fulltrúa skv. 1.mgr en hann hafði fyrir í ráðinu fjölgar fulltrúunum af fyrri listanum svo jafnmargir verði af báðum listum framboðsins í ráðinu.
b. Ef framboðsaðili til Stúdentaráðs hlýtur færri fulltrúa skv. 1.mgr. en hann hafði fyrir í ráðinu fækkar fulltrúunum af fyrri listanum svo jafnmargir verði af báðum listum framboðsins í ráðinu.
c. Nú býður aðili fram lista í fyrsta sinn til Stúdentaráðs eða aftur eftir hlé og fær menn kjörna inn í ráðið skv. 1.mgr. Hlýtur þá framboðið tvo fulltrúa í ráðið fyrir hvern einn sem kjörinn er skv. 1.mgr.
d. Ef framboðsaðili býður ekki fram til Stúdentaráðs, en gerði það árið áður, falla allir fulltrúar framboðsins út úr ráðinu.
e. Stúdentaráðsliðar eða varamenn, sem hyggjast bjóða sig fram fyrir annað framboð, skulu leggja fram skriflega afsögn á skrifstofu Stúdentaráðs hið minnsta einum mánuði fyrir upphaf kjörfundar, en geta ellegar ekki tekið sæti á lista annars framboðs.
24. gr. Hver sá sem hefur kosningarétt í kosningum til Stúdentaráðs, Háskólaráðs eða Háskólaþings getur véfengt lögmæti kosninganna og skal hann þá leggja fram skriflega og rökstudda kæru til Skrifstofu Stúdentaráðs innan tveggja vikna frá lokum kjörfundar.
Gerðardómur Stúdentaráðs HÍ úrskurðar um lögmæti kosninganna.
Gerðardómur Stúdentaráðs HÍ skal fullskipaður ekki síðar en viku eftir að kærufrestur er liðinn, hafi skrifleg og rökstudd kæra borist skrifstofu SHÍ. Þær fylkingar sem bjóða fram í viðkomandi kosningum skulu koma sér saman um þrjá hlutlausa einstaklinga til þess að sitja í dómnum. Í dóminn skal skipa a.m.k. einn lögfræðing. Í gerðardóminn má ekki skipa stúdenta við HÍ. Gerðardómurinn skal skila niðurstöðu sinni um lögmæti kosninganna innan tveggja vikna eftir að hann er fullskipaður.
Sé niðurstaða Gerðardóms SHÍ að kosning til Stúdentaráðs og/eða háskólaráðs eða háskólaþings hafi brotið í bága við lög þessi og ætla megi að brotið hafi haft áhrif á úrslit kosninganna, skulu aukakosningar fara fram innan mánaðar. Sömu reglur gilda um aukakosningar og aðalkosningar.
Að kærufresti liðnum skal eyða kjörgögnum og eftirlitsgögnum framboðanna.
III. Valdataka – fastanefndir
25. gr. Á þeim tíma sem líður frá kosningum og uns ný stjórn Stúdentaráðs tekur við, er fráfarandi stjórn Stúdentaráðs óheimilt að stofna til verulegra skuldbindinga sem ekki eru í samræmi við daglegan rekstur skrifstofu Stúdentaráðs.
26. gr. Formaður Stúdentaráðs boðar nýkjörið ráð til fundar eigi síðar en tveimur vikum eftir síðasta kjördag. Hann stjórnar kjöri formanns Stúdentaráðs samkvæmt 55. gr. Telst þá nýkjörinn formaður sjálfkjörinn fundarstjóri nema annað sé ákveðið samkvæmt 49.gr. og stjórnar hann kjöri annarra stjórnarmeðlima svo og nefnda samkvæmt 27. gr.
27. gr. Á fyrsta fundi Stúdentaráðs skulu kosnir:
Í fyrsta lagi stjórn:
a) Formaður.
b) Varaformaður.
c) Gjaldkeri.
d) Ritari.
e) 1. meðstjórnandi.
f) 2. meðstjórnandi.
g) 3. meðstjórnandi
Í stjórn skal kjósa fulltrúa fylkinga sem eiga fulltrúa í Stúdentaráði í hlutfalli við fjölda ráðsliða viðkomandi fylkingar.
Sérhverju framboði sem á fulltrúa í stjórn Stúdentaráðs er heimilt að skipa tvo varafulltrúa í stjórn. Varafulltrúi hefur seturétt á stjórnarfundum sjái einn af fulltrúum viðkomandi framboðs sér ekki fært að mæta.
Í öðru lagi nefndarmenn í hverja fastanefnd sem tilgreind er í 29.gr.
Í þriðja lagi fulltrúi Stúdentaráðs í stjórn Lánasjóðs íslenskra námsmanna. Hann tekur þó ekki við af fyrri fulltrúa fyrr en samningaviðræðum um úthlutunarreglur næsta skólaárs er lokið.
28.gr. Í upphafi starfsárs Stúdentaráðs skulu allir fulltrúar þess skipaðir tengiliðir ákveðinna nemendafélaga Háskólans, eins eða fleiri, og skulu öll nemendafélög skólans hafa sinn tengilið í Stúdentaráði. Þetta skal gert í samráði við nemendafélögin. Ber hver fulltrúi ábyrgð á því að hafa regluleg samskipti við sín félög og koma málefnum og hagsmunum þeirra á framfæri innan ráðsins. Fulltrúinn skal boða nemendafélög sem hann er tengiliður við til fundar við sig minnst einu sinni á misseri.
29. gr. Á vegum Stúdentaráðs starfa 7 fastanefndir og sitja fimm manns í hverri þeirra. Eigi fylking, sem á fulltrúa í Stúdentaráði, engan nefndarmann í einhverri af fastanefndum ráðsins á sú fylking rétt á einum áheyrnarfulltrúa með málfrelsis- og tillögurétt í viðkomandi fastanefnd.
1. Menntamálanefnd: Nefndin vinnur að því að bæta aðstöðu stúdenta við Háskóla Íslands til æðri menntunar og kanna hvað helst megi gera til eflingar Háskólanum, sem kennslu- og vísindastofnunar.
2. Hagsmunanefnd: Nefndin tekur til meðferðar ýmis félagsleg hagsmunamál stúdenta og fríðindi stúdenta auk mála varðandi aðstöðu og öryggi stúdenta.
3. Alþjóðanefnd: Nefndin tekur til meðferðar alþjóðlega stúdentasamvinnu og er Stúdentaráði til ráðuneytis um samskipti þess við erlenda aðila. Nefndin tekur einnig til meðferðar mál varðandi hagsmuni erlendra stúdenta við Háskóla Íslands.
4. Fjármála- og atvinnulífsnefnd: Nefndin tekur til meðferðar málefni Lánasjóðs íslenskra námsmanna, önnur fjárhagsleg hagsmunamál stúdenta, skattamál og önnur skyld mál. Einnig atvinnumál stúdenta auk tengsla Háskólans, atvinnulífsins og stúdenta.
5. Jafnréttisnefnd: Nefndin tekur til meðferðar jafnréttismál stúdenta innan háskólans. Jafnréttisnefnd skal starfa í samráði við jafnréttisfulltrúa, sbr. 63.gr.
6. Fjölskyldunefnd: Nefndin tekur til meðferðar hagsmunamál og velferð fjölskyldufólks við Háskólann.
7. Félagslífs- og menningarnefnd: Nefndin skal stuðla að bættu félagslífi innan Háskólans og auknu menningarlegu hlutverki Stúdentaráðs.
Sérhver ráðsliði skal eiga sæti í a.m.k. einni fastanefnd.
30. gr. Fastanefndir Stúdentaráðs samkvæmt 29.gr. skulu á sínum fyrsta fundi kjósa sér formann. Sá fundur skal boðaður skriflega, og með tölvupósti, af formanni Stúdentaráðs.
31. gr. Fastanefndir halda fundi þegar þurfa þykir eða innan viku eftir að krafa um fund kemur fram, en sérhver nefndarmaður getur krafist fundar.
Formaður, sem kosinn er á fyrsta fundi, boðar fundi skriflega með a.m.k. eins dags fyrirvara, nema samkomulag sé í nefnd um annað. Fundir eru opnir öllum stúdentum, nema nefnd ákveði annað eða nauðsyn beri til. Allir ráðsliðar hafa rétt til setu á fundum fastanefnda. Hverri fastanefnd er heimilt að kalla til aðra stúdenta til nefndarfunda. Forfallist nefndarmaður skal hann boða varamann.
32. gr. Nefnd skal í upphafi starfs síns setja sér starfs- og fjárhagsáætlun að svo miklu leyti sem hægt er. Nefnd skal skila skriflegri skýrslu um störf sín til Stúdentaráðs á skilafundi skv. VIII.kafla.
33. gr. Stúdentaráð felur nefndum og einstaklingum sérstök verkefni með samþykki hverju sinni. Stúdentaráði er einnig heimilt að stofna starfshópa í kringum ákveðin, afmörkuð verkefni. Þessir einstaklingar og starfshópar skulu skila skriflegri skýrslu um störf sín til Stúdentaráðs þegar verkefninu er lokið. Feli verkefnið í sér utanlandsferð á kostnað Stúdentaráðs skal skýrslan vera ýtarleg og skulu fylgja með bókhaldsupplýsingar.
34. gr. Úrsögn úr Stúdentaráði skal vera skrifleg. Segi Stúdentaráðsliði sig úr ráðinu skal næsti einstaklingur af sama framboðslista taka fast sæti í Stúdentaráði.
IV. Stjórn Stúdentaráðs
35. gr. Stjórn Stúdentaráðs hefur með höndum framkvæmd þeirra ályktana, er ráðið gerir og annast þau verkefni, er það felur henni. Jafnframt getur hún á fundum sínum tekið ákvarðanir og afgreitt mál innan þeirra marka, er ráðið ákveður hverju sinni.
36. gr. Formaður Stúdentaráðs, í fjarveru hans varaformaður, stjórnar fundum stjórnar. Í fjarveru þeirra einhver stjórnarmanna samkvæmt ákvörðun hverju sinni.
37. gr. Formaður, í forföllum hans varaformaður, kemur fram fyrir hönd Stúdentaráðs í skiptum þess við aðila innan sem utan Háskólans. Ritari ritar fundargerðir stjórnarfunda og heldur utan um fundargerðir Stúdentaráðs. Meðstjórnendur taka þátt í störfum stjórnar með þeim hætti sem þurfa þykir.
38. gr. Gjaldkeri undirbýr fjárhagsáætlun Stúdentaráðs eitt ár fram í tímann í samráði við framkvæmdastjóra og leggur hana fyrir ráðið til samþykktar. Hann fylgist með hvernig áætlun stenst, gerir tillögur um leiðréttingar eftir því sem þörf gerist og bendir á fjáröflunarleiðir.
Gjaldkeri skal í samráði við framkvæmdastjóra gera Stúdentaráði grein fyrir fjáhagsstöðu ráðsins á þriggja mánaða fresti.
Formaður og framkvæmdastjóri skulu vera prókúruhafar að reikningum Stúdentaráðs.
39. gr. Stjórn SHÍ skal dreifa fundargögnum til ráðsliða fyrir hvern ráðsfund. Fundargerðir stúdentaráðsfunda skal senda stúdentaráðsliðum og setja á vefsíðu Stúdentaráðs.
40. gr. Á hverjum fundi Stúdentaráðs skal stjórn skýra ráðinu frá störfum sínum síðan síðasti fundur var haldinn.
41. gr. Stjórnarfundur telst lögmætur ef fjórir stjórnarmenn hið fæsta sitja fund.
42. gr. Lýsi Stúdentaráð vantrausti á stjórnarmann, skal hann fara frá. Þó er honum heimilt að krefjast annars stúdentaráðsfundar um málið, hafi ráðið ekki verið fullskipað er vantrausti var lýst. Skal sá fundur haldinn innan viku og gildir ákvörðun hans, sé hann lögmætur. Verði vantraustið samþykkt aftur, skal Stúdentaráð kjósa mann í hans stað.
43. gr. Stjórn Stúdentaráðs skal gæta þess að gagnkvæm upplýsingatengsl séu á milli Stúdentaráðs og nemendafélaga stúdenta. Samráðsfundir með formönnum þessara félaga skulu haldnir reglulega og eigi færri en fjórir yfir skólaárið. Á samráðsfundum skal starfið í Stúdentaráði og háskólaráði kynnt, aflað álits nemendafélaga og fengnar upplýsingar um helstu mál hinna ýmsu félaga.
44. gr. Stjórn stúdentaráðs skal reglulega, minnst fjórum sinnum á hverju starfsári, boða alla deildafulltrúa nemenda við Háskóla Íslands á samráðsfund með sér. Á þeim fundum skal kynna störf Stúdentaráðs og Háskólaráðs fyrir deildarfulltrúum og leitast eftir áliti þeirra á helstu málefnum og upplýsingum um stöðu mála í þeirra deildum
V. Fundir Stúdentaráðs
45. gr. Stúdentaráðsfundir skulu haldnir a.m.k. 10 sinnum á ári. Stjórn Stúdentaráðs boðar til Stúdentaráðsfundar. Meirihluti stjórnarmanna getur, ef ágreiningur rís um meðferð mála innan stjórnar, vísað máli til næsta ráðsfundar til ákvörðunar. Sjö stúdentaráðsliðar geta skriflega krafist fundar í ráðinu, sem skal þá halda innan viku frá því að krafan er fram komin.
46. gr. Stúdentaráðsfundir eru opnir öllum háskólastúdentum. Meirihluti ráðsins getur ákveðið að loka fundi þegar slíkt telst nauðsynlegt til varnar viðkvæmum persónulegum hagsmunum einstaklinga sem mál varðar eða ef óhjákvæmilegt þykir til að halda uppi friði á fundinum. Stúdentaráðsfundur getur að fenginni beiðni frá öðrum stúdentum heimilað almennar umræður um dagskrárliði ef meirihluti viðstaddra ráðsliða samþykkir það. Fulltrúi sérhvers nemendafélags skal þó, ef hann óskar, getað tekið til máls án sérstaks samþykkis Stúdentaráðs, nema fundi hafi verið lokað enda gæti hann reglna um fundarsköp ráðsins. Þegar svo háttar sem hér segir að aðili utan Stúdentaráðs tekur til máls, er fundarstjóra heimilt að takmarka ræðutíma við 5 mínútur.
47. gr. Stúdentaráðsfundi skal boða á tryggilegan hátt með tölvupósti til allra ráðsliða, nemenda- og hagsmunafélaga og með birtingu á vefsíðu Stúdentaráðs. Fundi skal boða með þriggja daga fyrirvara. Heimilt er að boða til fundar með skemmri fyrirvara ef nauðsyn ber til. Í fundarboði skal geta dagskrár og skulu ráðsliðar hvattir til að boða varamann sbr. 8.gr., sjái þeir sér ekki fært að mæta.
48. gr. Eigi atkvæðagreiðsla á stúdentaráðsfundi að vera lögleg verður meirihluti réttkjörinna fulltrúa, skv. 23.grein að vera viðstaddur.
49. gr. Formaður Stúdentaráðs, í fjarveru hans, varaformaður, stjórnar fundum ráðsins eða tilnefnir annan í sinn stað.
50. gr. Í upphafi hvers fundar skal skipa fundarritara. Fundargerð skal lesin upp og samþykkt í fundarlok, sé þess óskað, ellegar send út skriflega fyrir næsta fund og tekin þá fyrir til samþykktar.
Umræður eru ekki leyfilegar um fundargerð, og skulu breytingartillögur afgreiddar þegar í stað. Frekari breytingar fundarmanna á gjörðabókinni eru ekki heimilar nema í formi skriflegrar athugasemdar, sem afhenda skal ritara. Ritara er skylt að skrá slíka athugasemd aftan við umdeilda fundargerð, enda sé athugasemdin undirrituð og ekki lengri en 100 orð.
51. gr. Fundarmaður sem óskar að taka til máls, skal óska þess við fundarstjóra, sem skal skrá menn á mælendaskrá í þeirri röð sem menn biðja um orðið. Framsögumanni skal þó leyft að koma að stuttum skýringum þrátt fyrir mælendaskrá.
52. gr. Fundarmenn geta skilað inn skriflegri bókun varðandi málefni sem til umræðu eru á stúdentaráðsfundi. Skal þá slík bókun færð í fundargerð á tilheyrandi stað. Einnig geta fundarmenn boðað framlagningu bókunar og skal hún þá berast ritara stjórnar Stúdentaráðs eigi síðar en í upphafi næsta Stúdentaráðsfundar eftir að til hennar var boðað.
53. gr. Tillögur skal flytja skriflega og leggja fram við fundarstjóra og er ekki heimilt að taka tillögur í öðru formi til greina. Ef meginmál tillögu er ekki lengra en 100 orð, er hægt að krefjast þess að henni sé dreift skriflega til allra fundarmanna. Ef ekki er orðið við slíkri kröfu fundarmanna, telst tillagan ekki rétt fram komin.
54. gr. Tillögur skal taka til umræðu um leið og þær berast. Þó skulu eftirfarandi tillöguflokkar bornir undir atkvæði þegar í stað og umræðulaust, nema ef á ræðu stendur eða atkvæðagreiðslu:
a) Tillaga um fundarhlé.
b) Dagskrártillaga.
c) Tillaga um atkvæðagreiðslu.
d) Frávísunartillaga.
e) Tillaga um að vísa máli til stjórnar eða nefndar.
f) Tillaga um vantraust á fundarstjóra.
55. gr. Atkvæðagreiðslur skulu fara fram með handauppréttingu eða á annan opinberan hátt. Leynileg atkvæðagreiðsla skal fara fram ef einhver ráðsliði æskir þess. Ráðsliða er heimilt að biðja fundarstjóra um orðið til þess að gera stuttlega grein fyrir atkvæði sínu áður en atkvæði eru talin.
56. gr. Einfaldur meirihluti ræður úrslitum mála og kjöri, nema annað sé tekið fram í lögum þessum. Sjö stúdentaráðsliðar geta þó krafist almenns stúdentafundar um mál.
57. gr. Kjör í stjórn, nefndir og önnur störf skal vera hlutbundið. Við kjör í stjórn Félagsstofnunar stúdenta og Lánasjóðs íslenskra námsmanna skal þó hver fulltrúi ásamt varafulltrúa kjörinn sérstaklega. Heimilt er að krefjast þess, að sá sem stungið er upp á láti í ljós samþykki sitt eða samþykkið sé vottað með öðrum tryggilegum hætti.
58. gr. Nú falla atkvæði jafnt, og telst þá tillaga fallin. Ef atkvæði falla jafnt við kjör, skal endurtaka kosningu milli viðkomandi frambjóðenda þegar í stað. Falli atkvæði enn jafnt, ræður hlutkesti. Ritari telur atkvæði.
VI. Framkvæmdastjóri - blaðaútgáfa - jafnréttisfulltrúi - alþjóðafulltrúi.
59. gr. Stúdentaráði skal heimilt að ráða sér framkvæmdastjóra til þess að framkvæma ákvarðanir Stúdentaráðs og hafa yfirumsjón með rekstri skrifstofu ráðsins í samráði við stjórn Stúdentaráðs. Framkvæmdastjóri hefur yfirumsjón með bókhaldi og reikningum Stúdentaráðs og ber ábyrgð á gerð ársreikninga Stúdentaráðs. Skal hann kynna þá fyrir Stúdentaráði innan árs frá lokum reikningsárs og þeir birtir á vefsvæði ráðsins eftir samþykkt þeirra.
60. gr. Framkvæmdastjóri ráðsins hefur málfrelsi og tillögurétt á fundum ráðsins.
61. gr. Stúdentaráð gefur út Stúdentablaðið, sem koma skal út reglulega yfir skólaárið. Blaðið skal fjalla um málefni stúdenta og vera opið öllum stúdentum, þó með þeim takmörkunum sem segir í 62.gr.
62. gr. Ritstjóri Stúdentablaðsins skal ráðinn af Stúdentaráði en þó aldrei til lengri tíma en eins árs. Ritstjóri ákveður efni blaðsins í samstarfi við ritnefnd og ber ábyrgð á því að lögum.
Ritstjóri skal auglýsa eftir fulltrúum í ritnefnd Stúdentablaðsins með almennum stúdentapósti. Stúdentaráð skal að auki skipa tvo fulltrúa í ritnefnd Stúdentablaðsins og skulu þeir kosnir hlutbundinni kosningu á fyrsta fundi ráðsins eftir skipun ritstjóra.
Ritstjóri skal leggja fjárhagsáætlun hvers tölublaðs fyrir framkvæmdastjóra.
Heimilt er að setja nánari ákvæði um Stúdentablaðið í reglugerð.
63. gr. Stúdentaráð skal í upphafi hvers starfsárs auglýsa stöðu jafnréttisfulltrúa Stúdentaráðs. Hlutverk hans skal vera að fylgjast með stöðu og framgangi í jafnréttismálum innan Stúdentaráðs og Háskólans. Jafnréttisfulltrúi Stúdentaráðs skal skipaður af stjórn Stúdentaráðs en þó aldrei til lengri tíma en sem nemur starfstíma þess Stúdentaráðs. Ef jafnréttisfulltrúi Stúdentaráðs situr ekki í jafnréttisnefnd þá verður hann áheyrnarfulltrúi á fundum nefndarinnar. Heimilt er að setja nánari ákvæði um verksvið jafnréttisfulltrúa í reglugerð.
64. gr. Stúdentaráð skal í upphafi hvers starfsárs auglýsa stöðu alþjóðafulltrúa Stúdentaráðs. Hann skal gegna hlutverki þjónustuaðila við erlenda stúdenta við Háskóla Íslands og geta erlendir stúdentar leitað til hans með fyrirspurnir varðandi háskólavistina sem og annað sem snýr að dvöl þeirra hérlendis. Alþjóðafulltrúi skal skipaður af stjórn Stúdentaráðs en þó aldrei til lengri tíma en sem nemur starfstíma þess Stúdentaráðs. Heimilt er að setja nánari ákvæði um verksvið alþjóðafulltrúa í reglugerð.
65. gr. Stúdentaráð skal í upphafi hvers starfsárs auglýsa stöðu lánasjóðsfulltrúa Stúdentaráðs.
Lánasjóðsfulltrúi Stúdentaráðs skal skipaður af stjórn Stúdentaráðs en þó aldrei til lengri tíma en sem nemur starfstíma þess Stúdentaráðs. Ef lánasjóðsfulltrúi Stúdentaráðs situr ekki í Fjármála- og atvinnulífsnefnd þá verður hann áheyrnarfulltrúi á fundum nefndarinnar. Heimilt er að setja nánari ákvæði um verksvið lánasjóðsfulltrúa í reglugerð.
66. gr. Við ráðningu framkvæmdastjóra Stúdentaráðs og ritstjóra Stúdentablaðsins skal meta umsækjendur á faglegum grunni og líta sérstaklega til starfsreynslu og þekkingar á viðkomandi sviði. Auglýsa skal starfið laust til umsóknar, með skýrum hætti t.d. í útbreiddu dagblaði. Auglýsinguna skal birta minnst 10 virkum dögum fyrir lok umsóknarfrests.
67. gr. Um mannaráðningar sem ekki er mælt fyrir í lögum þessum fer eftir ákvörðun Stúdentaráðs.
VII. Réttindaskrifstofa stúdenta
68. gr. Stúdentaráð rekur Réttindaskrifstofu stúdenta. Hún starfar undir umsjón ráðsins. Þar skulu nemendur og kennarar Háskóla Íslands eiga aðgang að lögum og reglugerðum Háskólans, einstakra deilda og skora. Skrifstofan skal af mætti aðstoða námsmenn í málarekstri þeirra innan skólans. Heimilt er að setja nánari ákvæði um starfrækslu skrifstofunnar í reglugerð.
VIII. Skilafundur
69. gr. Á tímabilinu 1.mars - 20.maí skal fráfarandi Stúdentaráð gera almennum stúdentafundi, skilafundi, grein fyrir gerðum sínum og leggja fram endurskoðaða reikninga ráðsins. Á þessum fundi skal jafnframt gerð grein fyrir þeim stofnunum og sjóðum sem ráðið er aðili að. Skilafundur kýs 2 endurskoðendur og 2 til vara fyrir næsta starfsár.
70. gr. Skilafund skal boða í almennum Stúdentapósti og með tölvupósti til formanna deildar- og skorarfélaga stúdenta og Stúdentaráðsliða.
71. gr. Að öðru leyti en segir í 69. og 70.gr. lýtur skilafundur sömu reglum og almennur stúdentafundur.
IX. Almennir stúdentafundir
72. gr. Almenna stúdentafundi skal halda eftir kröfu 50 háskólastúdenta hið fæsta eða sjö stúdentaráðsliða. Skal krafan vera skrifleg og beint til stjórnar Stúdentaráðs, er síðan boðar til fundarins ásamt dagskrá eigi síðar en svo, að fundinn megi halda innan viku frá því að krafan er fram komin.
73. gr. Almennir stúdentafundir taka til umræðu og ályktana mál sem heyra til verksviðs Stúdentaráðs eða snerta á annan hátt alla námsmenn sem skráðir eru til náms í Háskóla Íslands. Stúdentaráði er skylt að fara að fyrirmælum 2/3 fundarmanna á almennum stúdentafundi um málefni sem auglýst hefur verið í fundarboði, enda hafi 200 stúdentar Háskóla Íslands a.m.k. tekið þátt í atkvæðagreiðslu um málið. Almennur stúdentafundur getur úrskurðað um hvort Stúdentaráð hafi farið að fyrirmælum fundar boðuðum samkvæmt fyrsta málslið 1. mgr. Samþykki almennur stúdentafundur að ráðið hafi ekki farið að fyrirmælum fundarins getur hann samþykkt að boðað verði til kosninga innan fjögurra vikna frá fundinum. Sömu reglur gilda um fjölda fundarmanna og samþykki og samkvæmt 2. ml., 1. mgr. 66. gr.
74. gr. Til almenns stúdentafundar skal boða í almennum Stúdentapósti og með auglýsingu í helstu kennslubyggingum Háskólans. Fundarefnis skal geta í fundarboði. Formaður Stúdentaráðs stjórnar kosningu fundarstjóra í upphafi fundar, en er að öðru leyti ekki starfsmaður fundarins. Rétt til að taka þátt í afgreiðslu máls á almennum stúdentafundi hafa þeir einir, er skráðir eru til náms í Háskólanum. Komi upp ágreiningur um rétt til fundarsetu skal málinu skotið til úrskurðar fundarins.
75. gr. Skrifi 5% eða fleiri háskólanemar undir áskorun þess efnis skal Stúdentaráð boða til almennra kosninga í Háskólanum um ákveðið málefni sem viðkemur hagsmunum stúdenta. Stúdentaráði er skylt að fara eftir niðurstöðu atkvæðagreiðslunnar, þar sem einfaldur meirihluti gildir, ef kjörsókn er ekki meira en 5 prósentustigum lægri en í síðustu kosningum til Stúdentaráðs.
a) Leitast skal við að þessar kosningar séu rafrænar og að öllum háskólanemum gefist kostur á að kjósa. Stúdentaráð skal boða til kosninganna, skipuleggja þær og kynna hvað kosið er um mest viku eftir að gild áskorun berst ráðinu og skulu kosningarnar fara fram minnst viku og mest tveimur vikum síðar. Um kærur um lögmæti kosninganna fer eftir 24. grein laga þessara.
X. Gildistaka og breytingar
76. gr. Til þess að lögum þessum verði breytt eða við þau aukið, verður eftirfarandi skilyrðum að vera fullnægt:
a) Tillaga um breytinguna þarf að hafa verið kynnt í fundarboði eða lögð fram á síðasta fundi ráðsins.
b) Breytingin þarf að hljóta samþykki a.m.k. 2/3 fundarmanna og ekki færri en 9.
c) Lagabreyting öðlast þegar gildi nema á annan veg sé kveðið í henni. Lagabreytingar skal auglýsa tryggilega. Tilkynning um samþykki Stúdentaráðs á lagabreytingu skal birt á vefsíðu Stúdentaráðs.
d) Sé almennur stúdentafundur haldinn um lagabreytinguna innan mánaðar frá því að hún var samþykkt, getur hann því aðeins fellt hana úr gildi að hann fullnægi ákvæðum IX. kafla laganna. Fullnægi almennur stúdentafundur ekki þessum ákvæðum ákveður Stúdentaráð hvort lagabreytingin skuli felld úr gildi eða málið tekið fyrir að nýju.
77. gr. Að loknum lagabreytingum skal formaður Stúdentaráðs gefa út gildandi lög ráðsins, ásamt þeim reglugerðum sem stoð eiga í lögum þessum. Formaður Stúdentaráðs ber ábyrgð á því að gildandi lög stúdentaráðs séu alltaf aðgengileg.
78. gr. Lög þessi öðlast þegar gildi.
(brblög sem gilda til 1.1.2012)
I.
Kosningar til stúdentaráðs og háskólaráðs 2011 skulu haldnar á rafrænan hátt. Um framkvæmd kosninganna fer samkvæmt II. kafla þessara laga, að undanskildum 18., 19., 20. og 21. gr. Í stað þessara greina gilda eftirfarandi ákvæði til bráðabirgða um kosningarnar.
II.
Kjörstjórn skal heimilt að leita til sérfróðra aðila um framkvæmd rafrænna kosninga.
Framkvæmd skal vera hagað þannig að öllum stúdentum sé gert kleift að nýta kosningarétt sinn og skal kosning opin á hinu rafræna kosningakerfi í allt að tvo daga. Kjörstjórn ákveður opnunartíma hins rafrænna kosningakerfis á kjördögum.
Kjörstjórn skal auglýsa opnunartíma kosningakerfisins a.m.k. 15 dögum fyrir kjörfund. Heimilt er að skjóta ákvörðunum kjörstjórnar um opnunartíma kosningakerfis til Stúdentaráðs. Skal það gert a.m.k. 10 dögum fyrir upphaf kjörfundar
III.
Allur áróður í byggingum Háskóla Íslands er bannaður á kjördögum. Frambjóðendum er aðeins heimilt að vera í byggingunum, þurfi þeir að sækja tíma eða sinna öðrum sambærilegum erindum. Kjörstjórn setur reglur um framkvæmd þessa ákvæðis og sendir út leiðbeiningar til framboða um þær.
Kjörstjórnarfulltrúar veita skriflega áminningu ef brotið er gegn lagaákvæðum um framkvæmd kosninga. Kjörstjórnarfulltrúi sem áminningu veitir skal gera áminntum aðila grein fyrir ástæðu áminningarinnar, og veita honum færi á að koma að athugasemdum. Sé aðili þrívegis áminntur er kjörstjórn skylt að tilkynna stúdentum um hvaða aðila er að ræða og fyrir hvað hann var áminntur. Tilkynningin skal birt á opinberum vettvangi; á tilkynningatöflum og á heimasíðu Stúdentaráðs. Sé um að ræða frambjóðanda skal tekið fram hvaða framboði hann tilheyrir.
Áminntur aðili getur skotið áminningunni til kærunefndar kjörstjórnar innan klukkustundar eftir að hún er veitt. Skal hún úrskurða um réttmæti áminningar innan innan klukkustundar frá því að kæra berst. Kjörstjórn skal skipa þrjá einstaklinga í kærunefnd viku fyrir fyrri kjördag.
IV.
Framboðum skal heimilt að hafa eftirlit með framkvæmd kosninganna. Kjörstjórn setur nánari reglur um það.
V.
Utankjörfundur skal haldinn einn virkan dag frá kl. 11:00-16:00 í síðustu viku fyrir kjördag. Þeir sem greiða atkvæði við slíka atkvæðagreiðslu skulu gefa út drengskaparheit um að þeir telji sig ekki geta greitt atkvæði á kjördag.
Á kjördögum skal stúdentum sem af einhverjum ástæðum ekki geta tengst rafræna kosningakerfinu gefinn kostur á að greiða atkvæði utankjörfundar. Sá sem óskar eftir að greiða atkvæði á þennan hátt skal gefa sig fram á þjónustuborði HÍ á Háskólatorgi á meðan kjörfundur stendur og skal slík beiðni studd drengskaparheit um að viðkomandi geti ekki tengst rafræna kosningakerfinu. Kjörstjórn skal þá svo fljótt sem auðið er veita honum tækifæri á að greiða utankjörfundaratkvæði. Þetta úrræði skal kynnt í auglýsingu sem send er út samkvæmt 2. mgr. III. ákvæðis til bráðabirgða.“
-- English summary
The Student Council statutes
The Student Council work is bound by its statutes, which are pretty straight forward and
describe the work of the Student Council. If you have any questions regarding the Student
Council statutes, as they only exist in Icelandic, please contact the office or email us at
shi@hi.is!
